荔湾站前街评选“十大好邻居”,十几个候选人平均年龄超过70岁,其中最大年纪嘅高伯已经80高寿了,最后生嘅嗰个都有47岁。评选结果就有啲意思了,同样係热心嘅邻居,80高龄嘅高伯入选,而47岁嘅刘姨却落选,睇来都係年纪大啲有优势,识得嘅人多啲,名望都大啲。
其实,呢啲都唔出奇,如果你知道呢啲街坊嘅情谊係点样培养嘅,就可以明白点解大家都咁“尊老”了。以前,街坊之间唔似得依家商品房嘅住户咁只有“点头微笑”嘅交集,大家之间嘅关系更似亲戚而非邻居。二十几年前,大家都穷,想食肉都要凭肉票买,而每个家庭嘅肉票係有限额嘅,就係咁稀罕嘅肉,街坊们都要同隔离左右分享,买返来一斤肉煮熟咗,呢头送两舊,嗰头送两舊。一家人修屋,几家人来帮手,有啲街坊嘅感情好到好似亲兄弟。
当然,大家有时都会有啲摩擦。比如嗰阵时成条街共用一个水喉,咁就会因为兼队、边家人用得多而嗌交,呢个时候,就会有一啲明事理嘅人出来调停了,时间耐咗,隔离左右之间有啲乜嘢摩擦,都会搵佢哋来评理。虽然依家都有好多热心嘅年轻街坊,但係比起老一辈,资历、名望仲係有差距嘅,所以,高伯将刘姨比咗落去,都係合情合理嘅。
不过,令我担忧嘅係,呢个“十大好邻居”评选,连最后生嘅候选人都47岁,点解冇一个后生仔去参选呢?係嗰啲后生仔对呢啲事唔关心呢,定係“好邻居”后继乏人呢? |